شەڕ لە باکوور بەردەوامە؛ کوژران و برینداربوونی ٢٣ سەربازی تورکیا
Saturday, August 15, 2015
NNSROJ: لە ماوەی کەمتر لە ٢٤ کاتژمێری ڕابردوودا، چەند شەڕ و پێکدادانی دژوار لە نێوان گەریلاکانی پەکەکە و سوپای تورکیا هاتوونەتە ئاراوە و لە ئاکامدا هەریکەم ٧ سەربازی تورکیا کوژراون و ١٦ی تر بریندار بوونە.
ڕۆژی هەینی ١٤ی ئاگۆست، چەندین بنکە و بارەگای سوپای تورکیا لە لایەن هێزەکانی پاراستنی گەل، باڵی سەربازی پەکەکەوە هێرشیان کرایە سەر و لە یەکێک لەو هێرشانەدا لە گەڤەڕ، ٣ سەربازی تورکیا کوژران و شەشی تر بریندار بوون.
بە گوێرەی مێدیاکانی نزیک لە پەکەکە، هەژماری کوژراوانی سوپای تورکیا زۆر زیاتر لەو هەژمارەیە کە ڕاگەیاندراوە. بەرەبەیانیی شەممە ١٥ی ئاگۆستیش، لە تاتوانی بەتلیسیش شەڕ هاتۆتە ئاراوە و لە ئاکامدا ٢ عەکسەر بریندار بوونە.
پاشنیوەڕۆی هەمان ڕۆژ، لە سەر ڕێگەی شارۆچکەی "کارلی ئۆڤا"ی چەولیکی باکووری کوردستان، بۆمبێکی چینراو بە زرێپۆشێکی سوپای تورکیادا تەقییەوە و لە ئاکامدا سێ عەسکەر کوژران و ٦ی تر بریندار بوون.
سوپای تورکیا هەواڵەکەی پشتڕاست کردۆتەوە و ڕایگەیاندووە کە دوابەدوای تەقینەوەکە هێزی زیاتر ڕەوانەی ناوچەکە کراوە و شەڕ و پێکدادان لە نێوان عەسکەر و گەریلاکانی پەکەکەدا هاتۆتە ئاراوە.
هاوکات لەگەڵ شەڕ و پێکدادانە سەربازییەکان، لە شاری ئیستانبووڵیش پۆلیسی تورکیا لە ئۆپێڕاسیۆنێکی هاوکاتدا، هێرشی بردە سەر ٢٣ ماڵ و شوێنی کاری هاووڵاتییانی کورد و چالاکانی چەپ و لە ئاکامدا ١٥ کەسی قۆڵبەست کرد.
بە گوێرەی مێدیاکانی باکووری کوردستان، زۆربەی قۆڵبەستکراوان چالاکانی ئەندام لە هەدەپە و ڕێکخستنی گەنجانی ئەو حیزبەن. لە شارەکانی مێردین، وان، دەنیزلی و عەنتەپیش ئۆپێراسیۆنی هاوشێوە پێکهاتوون و لە ئاکامدا زیاتر لە ٥٠ چالاکی کورد و چەپگر قۆڵبەست کراون.
درەنگانی ئێوارەش لە ئیغدیر، هاتای و شەمزینانی جۆڵەمێرگ شەڕ هاتە ئاراوە کە لە ئاکامیاندا بە گوێرەی زانیارییە سەرەتاییەکان، عەسکەرێک کوژراوە و ٢ی تر بریندار بوونە.
م.م.
PHOTO: AA
پەیوەندی‌دار:
تەگ:
مافی بڵاوکردنەوەی سەرجەم بابەتەکانی ناوەندی نووچە و شرۆڤەی رۆژ پارێزراوە