چەکی ئێرانی لە حەشارگەیەکی تاڵیبانەکاندا

NNSROJ: هێزە سەربازییەکانی ئەفغانستان دەستیان بەسەر حەشارگەیەکی چەکی تاڵیبانەکاندا گرتووە کە لەناویاندا ژمارەیەکی زۆر چەکی ئێرانیش دەبینرێن.

وێبسایتی "خاماپرێس"ی ئەفغانی بڵاوی کردەوە کە هێزە سەربازییەکانی ئەو وڵاتە، لە ویلایەتی "بامیان"، حەشارگەیەکی چەک و تەقەمەنیی بزووتنەوەی تاڵیبانیان دۆزیوەتەوە کە بێجگە لە ژمارەیەک چەکی سەردەمی سۆڤیەتی پێشوو، هەروەها کۆمەڵێک چەک و تەقەمەنیی دروستکراوی ئێرانیشی تێدا بووە.

والیی ویلایەتی بامیان، محەمەد زاهیر زاهیر، بە ڕۆژنامەنووسانی گوتووە کە حەشارگەکە، لەمیانەی "ئۆپەراسیۆنێکی تایبەت"ی هێزە ئەمنی و سەربازییەکانی ئەفغانستاندا دۆزراوەتەوە و دەستی بەسەردا گیراوە.

زاهیر، وێرای ئاشکرا کردنی ژمارەی چەک و تەقەمەنییە دەستبەسەرداگیراوەکە، ڕوونیشی کردۆتەوە کە وڵاتەکەی، لەم پەیوەندییەی تاڵیبان و وڵاتانی جیرانی نیگەرانە.

دۆزینەوەی ئەو چەکانە لە کاتێکدایە کە کاربەدەستانی ئەفغانستان، بەهۆی هاوکارییەکانیان بۆ بزووتنەوەی تاڵیبان و باقیی گرووپە توندئاژۆکان، چەندین جار ڕەخنەیان لە وڵاتانی جیرانی وەک ئێران و پاکستان گرتووە. 

کاربەدەستان هەروەها ڕاستەوخۆ کۆماری ئیسلامیی ئێرانیان بەوە تاوانبار کردووە کە یارمەتیی گرووپە جیهادییەکانی ئەفغانستان دەدات، بەڵام وەک وێبسایتەکە نووسیویەتی "ئێران ئەم تۆمەتانە ڕەت دەکاتەوە".

کاربەدەستانی کۆماری ئیسلامیی ئێران، تا ئێستا سەبارەت بەم کەیسە هیچ لێدوانێکیان نەداوە.

ک. م