پەیەدە ئەمجارەش بۆ جڤینەکەی "ژنێڤ" بانگێشت نەکرا
Saturday, March 12, 2016
NNSROJ- بە گوتەی وتەبێژی وەزارەتی دەرەوەی ئەمریکا؛ پارتی یەکێتیی دیموکراتیک(پەیەدە) بۆ جڤینەکەی رۆژی ١٤ی مارسی ژنێڤ بانگێشت نەکراوە.
جۆن کیربی وتەبێژی وەزارەتی دەرەوەی ئەمریکا لە لێدوانێکی رۆژنامەوانیدا رایگەیاند؛ ناوی پەیەدە لە لیستی ئەو لایەنانەدا نیە کە بۆ جڤینەکەی رۆژی ١٤ی مارسی تایبەت بە قەیرانی سووریا لە شاری ژنێڤ، بانگێشت کراون.
ئەمە لە کاتێکدایە کە سێرگێی لاڤرۆڤ وەزیری دەرەوەی رووسیا گوتوویەتی؛ پێویستە پەیەدە لە دانوستانەکانی ئاشتەوایی سووریادا بەشدار بکرێت.
وێدەچێت لە خولی تازەی کۆبوونەوەکانی ئاشتەواییدا کە بە نێوبژیوانیی رێکخراوی نەتەوە یەکگرتووەکان بەڕێوەدەچێت، لەمەڕ بژارەی پێکهاتەیەکی فیدراڵی کە یەکپارچەیی خاکی سووریا بپارێزێت، مشتومڕ بکرێت.
ستێفان دێمیستۆرا نێردراوی تایبەتی UN بۆ نێوبژیوانیی قەیرانی سووریا دەڵێت: "دەشێ لە ژنێڤ سەبارەت بە پێکهاتەی فیدراڵی گفتوگۆ بکرێت."
نزیکەی دوو حەوتەیە لە نێوان لایەنە ناکۆکەکانی سووریادا ئاگربڕ راگەیەنراوە و لە سەر ئەو بنەمایە چاوەڕێ دەکرێت رۆژی دووشەممەی دادێ، خولی نوێی کۆبوونەوەکان لە شاری ژنێڤ دەست پێ بکەنەوە.
سەرچاوە: IMCTV
ئەلف. و
پەیوەندی‌دار:
تەگ:
مافی بڵاوکردنەوەی سەرجەم بابەتەکانی ناوەندی نووچە و شرۆڤەی رۆژ پارێزراوە