ئه‌ندامێکی سه‌رکردایه‌تیی په‌ده‌که‌ - سووریا قۆڵبه‌ست کراوه‌

NNSROJ: ڕێکخراوێکی کوردیی ڕۆژئاوای کوردستان ڕایده‌گه‌یه‌نێت که‌ ئه‌ندامێکی سه‌رکردایه‌تیی پارتی دێموکراتی کوردی سووریا له‌ عه‌فرین ده‌ستبه‌سه‌ر کراوه‌ و ڕوونیشی ده‌کاته‌وه‌ که‌ هێزه‌کانی ئاسایش ئاماده‌ نین زانیاری له‌سه‌ر شوێنی گیرانی ناوبراو بده‌ن به‌ بنه‌ماڵه‌که‌ی.

ڕێکخراوی "کورد واچ"، به‌ پشتبه‌ستن به‌ لێدوانی بنه‌ماڵه‌که‌ی، ڕایده‌گه‌یه‌نێ که‌ ئاسایشی شاری عه‌فرین، سه‌ره‌تای مانگی مارس، "عه‌بدولڕه‌حمان ئاپۆ"ی ئه‌ندامی سه‌رکردایه‌تیی پارتی دێموکراتی کوردستان ـ سووریایان له‌ ماڵه‌که‌ی خۆیدا له‌ شاری عه‌فرین قۆڵبه‌ست کردووه‌ و له‌گه‌ڵ خۆیان بردوویانه‌.

به‌گوێره‌ی ئه‌و ڕێکخراوه‌ی داکۆکیکاری مافی مرۆڤ، ناوبراو له‌و کاته‌وه‌ تا ئێستا بێ سه‌روشوێنه‌ و ئاسایشی شاره‌که‌ش ئاماده‌ نییه‌ هیچ زانیارییه‌ک له‌سه‌ر شوێن و هۆکاری گیرانی ناوبراو بدات به‌ بنه‌ماڵه‌که‌ی.

ک. م