۱۰ چوارینە لە "ئارەش ئەفزەلی" هەرسین
Tuesday, May 10, 2016
(۱)
چه‌مم ئه‌سرین و دڵ پڕخۊن و له‌ش سه‌رد
دڵم پڕ زۊخ و پڕ ژان و پڕ ئه‌ژ ده‌رد
كی‌یه یێ‌گڕ بكیشیه كووڵ په ژاره‌م
کووه مێتێ كۆڕه مێتێ جووان مه‌رد
(۲)
مه‌زانی زۆڵفه‌كه‌ت كۆشته‌م مه‌زانی
تۆ باڵاكه‌م شكانی و چه‌مانی
دۆما تۆ دی چه‌مه‌نیه داخم هێ داخ
شه‌و و ته‌نیایی و ده‌س ڤه زۆرانی
(۳)
گلاره راسه‌كه‌م گیانم چزانی
خه‌ڤه‌ر نێری ڤه هاڵم كێ مه‌زانی
منم ئاواره‌كه‌ی كۆو و بیاوان
ته‌مۊره و شعر و دیلان و گوورانی
(۴)
ته‌مۊره ژه‌ن بژه‌ن جه‌رگم كه‌واوه
چوواری بۆخوه‌نم شعرێ گ باوه
ته‌مۊره‌ت هێزده و به‌ڵگێ ڤه شعرێ
گڕێ بۆوڕیمه ئی گش ناهساوه
(۵)
یه‌واره ڤه‌خته و دڵمه مه‌ناڵێ
نه ڤیرێ پرچێ و شێڤه و خاڵێ
نه دڵ داسه كه‌سێ دڵ بێكه‌سێ دڵ
ڤه مردن كێنێ‌ئێ گیریایه هاڵێ
(۶)
شه‌قێ نیمه‌روو و خوه‌رێ برێژان
گڕه و ئاگره و داڵ‌داڵه گێژان
شنه‌فتم ڤه ده‌نگ ناڵینێكه مه‌وت
یێ كێنێ ئاوێ هه‌ر ڤاران ڤاران
(۷)
شه‌وێ پڕ ئه‌ژ هه‌وار و ده‌رد و غه‌م بیم
سووارێ ئه‌ورێ پڕ ئه‌ژ دۊ و ته‌م چیم
ڤه گه‌ردێ مانگه‌شه‌و یێ گڕ م ناڵیم
چكه‌چك ئه‌سرێ ئاساره ڤه چه‌م دیم
(۸)
دڵم ته‌نیا ڤه سینه خڕه مارێ
دڵم دڵخوه‌ش ڤه ناڵین و هه‌وارێ
هه‌ناسه سینه پڕ داخم پڕئه‌ژ زۊخ
ڤه گه‌ردم ئه‌ورێ خه‌مباره مه‌وارێ
(۹)
شه‌وه‌ل تا سۆ م هام‌ڕێ‌ێم په‌ژاره
بگر ئاگره كز سینه‌م دیاره
ئه‌گه‌ر دڵخوه‌ش بوو وم سازێ بژه‌نم
ده‌نگێ ساز و ته‌مۊره‌م هه‌ر هه‌واره
(۱۰)
چه‌مه‌ڕێ¬یێ گه‌لاڕێژم بچوو دی
ڤه ڕێ ژینم سه‌ره لێژم بچوو دی
چه‌مه‌ڕێ چكه‌چك بارانێ چه‌ممم
تۆ ئه‌ێ خۊن‌ڕێژ و خۊن‌مێژم بچوو دی
پەیوەندی‌دار:
تەگ:
مافی بڵاوکردنەوەی سەرجەم بابەتەکانی ناوەندی نووچە و شرۆڤەی رۆژ پارێزراوە