ئازادیی گیراوێکی سیاسیی کورد، دوای ٧ ساڵ

NNSROJ- محەممەد ئەمین ئاگووشی گیراوی سیاسیی کورد پاش تێپەڕکردنی ٧ ساڵ زیندان لە گرتووخانەی زاهیدان، ئازاد کرا. 

بەپێی زانیارییەکانی کەمپەینی نێودەوڵەتیی مافی مرۆڤ، بە بۆنەی ٢٢ی رێبەندان ساڵڕۆژی سەرکەوتنی شۆڕشی ئێران، ٢ ساڵی کۆتایی سزای محەممەد ئەمین ئاگووشی وەبەر لێبوردن کەوتووە و رۆژی سێشەممە ١٦ی فێڤریە لە گرتووخانە ئازاد کراوە. 
ئاگووشی، ٧ ساڵ لەمەوبەر وێڕای ئیرەج محەممەدی و ئەحمەد پوولادخانی خەڵکی شاری پیرانشار، بە تۆمەتی سیخوڕی بۆ حکوومەتی هەرێمی کوردستان و ئەندامێتی لە حیزبێکی بەرهەڵستکاری ئێراندا، دەسبەسەر و رەوانەی گرتووخانەی ئیدارەی ئیتڵاعاتی ورمێ کرابوو.

ناوبراو دوای ٧ مانگ بەندکران لە ژووری تاکەکەسیی گرتووخانەی ئیدارەی ئیتڵاعاتدا، رەوانەی گرتووخانەی ناوەندیی ورمێ کرابوو و لە لقی دووی دادگەی سەربازیدا، سزای گوللەبارانی بەسەرداسەپێندرابوو.

ئەگەرچی دواتر ئەو بڕیارە لە لقی ٣١ی دیوانی باڵای ئێرانیش پەسند کرابوو، بەڵام لە ئەنجامی ناڕەزایەتیی پارێزەرەکەی، لقی یەکەمی دادگەی سەربازی سزای ئەو و ٢ تۆمەتبارەکەی دیکەی بۆ ١٠ ساڵ زیندان و دوورخستنەوە بۆ گرتووخانەی زاهیدان گۆڕیبوو.

ساڵی پار هاوسەری محەممەد ئەمین ئاگووشی بە هۆی نەخۆشییەوە لە نەخۆشخانەیەکی شاری پیرانشار کۆچی دوایی کردبوو.

هاوینی رابردووش کچی ئەو گیراوە سیاسییە بە ناوی کانی ئاگووشی لە تەمەنی ٢٢ ساڵیدا و دوای کۆچی دوایی دایکی، خۆی هەڵواسیبوو و کۆتایی بە ژیانی هێنابوو.