فەرمانی ٧٣

دارا ئازادمەنش
بۆ چیا محەمەدی

هاوین بوو...
لە ژێر درەختە پیرەکەی حەوشی ماڵەکە، کچەکە سەری لە سەر ڕانی دایکە جەوانەکەیدایە. دایک پەلکە بۆ زوڵفی دەگرێتەوه و گۆرانی دەچڕێ و کچەکەش بۆنی مێخەکی دایکی دەکات.
دایکی دەڵێت: ئیستا پەلکەکانت لە پەلکەی تاوس دەچێ.
کچەکە دەڵێت: چاوەکان تۆیش لە چاوی تاوس دایە گیان.

*
مشکەکان لە ترسا خۆیان دەخستە بەردەم پشیلەکان، پشیلەکان خۆیان دەخستە بەردەم سەگەکان، سەگەکانیش لە ترسا خۆیان دەخستە ژێر ماشینەکان...

تێلەڤیزیۆنەکان دەڵێن: شەمشەمەکوێرەکان هێرشیان کرد. ئەمە ٧٣یەمین جارە لە زبڵستانە تاریکەکانیانەوە دێنە دەرێ و هێرش دەکەن و دەکوژن و دەبەن و تاڵان دەکەن. بە سەدان منداڵ و پیر و لاو بەرەو شاخە پیرۆزەکان هەڵدێن.

*
شەمشەمەکوێرەکان خۆیان دەکوتا بە پەنجەرەی ژوورەکەدا و لە پەنجەرە و دەرگاوە دەهاتنە ژوورەوە. ژوورەکە تاریک دەبێت. دایک خۆی دەکا بە سپەری کچەکە. کراسەکەی دایک دەدڕێنن و چنگ ئەگرن لێی و دایک بریندار دەبێت. ژوورەکە سوور دەبێتەوە و پڕ دەبێت لە بۆنی مێخەک و کچەکە دەقیژێنێ. کچەکە دەخەنە نێو کیسەیەک و دەیبەن. کچەکەیش بۆنی مێخەکی دایکی دەبات.

*
کچەکە کراسێكی سپیی لە بەرە و لە قەفەسێکی تاریکدایە و پەلکەکانی قرتاون و تینوویەتی. چاوی کە دەبەستێ خەون دەبینێ کە گەورە بووە و دوو باڵی دەرهێناوه و لە بەرزاییەکانی شاخە پیرۆزەکانەوه لەگەڵ دەستەیەک تاوس هەڵدەفرێت. ئەو تاوسەی کە لە پێش هەموویانە، بە کچەکە دەڵێت: پەلکەکانت لە پەلکەکانی منداڵەکەم دەچێ.
:  چاوەکان تۆیش لە چاوی دایکم.

کچەکە لە ئاسمان لەگەڵ تاوسەکان دێتەخوارەوه. منداڵ و گەنج و پیر لە تاو تینوویەتی لە مەمکەی کچەکە دەست ئەکەنە ئاو خواردن...

کچەکە پەشۆکاو لە خەو رائەچڵەکێ و مەمکەی ئێش ئەکات.
شەمشەمەکوێرەیەک لە دەرەوەی قەفەسەکە ئاو دەکاتە ناو پەرداخی نیۆ قەفەسەکە و کچەکە لەقەیەک ئەدا لە پەرداخەکە و ئاوەکە دەڕژێنێ.

*
لە دەوروبەری گۆڕەپانەکە هەرایە. پیاوەکان و شەمشەمەکوێرەکان سەیری کچەکە دەکەن.
شەمشەمەکوێرەکەی تەنیشت قەفەسەکە دەڵێ: نرخی ئەم کچە تەنیا ٧٣ دۆلاری ئەمریکییە.
یەکێک لە پیاوەکان دەڵێ: من دەیکڕم.

پیاوەکە ٧٣ دۆلار لە گیرفانیەوە ئەهێنێتە دەرەوە، ئەیدات بە شەمشەمەکوێرەکەی تەنیشت قەفسەکە. دەرگای قەفەسەکە باز دەبێت پیاوەکە دەستی کچەکە دەگڕێت، کچەکە دەستی دائەخات و چاو ئەبڕێتە ئاسمان، خۆرەتاو لە پشت هەورەکانەوە دیارە...

پاییز بوو...