تورکیا: "لێدوانه‌که‌ی رووسیا گاڵته‌جاڕانه‌یه"
Thursday, December 31, 2015
NNSROJ: به‌رپرسێکی تورکیا، لێدوانه‌که‌ی وه‌زاره‌تی ده‌ره‌وه‌ی رووسیا له‌مه‌ڕ گرژییه‌کانی باکووری کوردستانی به پێکه‌نیناوی له‌قه‌ڵه‌مدا و روو به‌و وڵاته گوتی: با وانه‌ی مرۆڤایه‌تیمان فێر نه‌کات.
تانژو بیلگیچ وته‌بێژی وه‌زاره‌تی ده‌ره‌وه‌ی تورکیا، له پرێس کۆنفڕانسێکدا، تانه‌ی له لێدوانه‌که‌ی وه‌زاره‌تی ده‌ره‌وه‌ی رووسیا دا که تێیدا مۆسکۆ، نیگه‌رانیی خۆی له کوژرانی خه‌ڵکی سڤیلی کورد ده‌ربڕیبوو، داواشی له ئه‌نقه‌ره کردبوو؛ به شێوازی سیاسی پرسی کورد چاره‌سه‌ر بکات.
ئه‌و به‌رپرسه‌ی تورکیا رایگه‌یاند: "کارنامه‌ی رووسیا له بواری مافی مرۆڤ و دیموکڕاسیدا، له به‌ر چاوی رای گشتی جیهانه و ئه‌و وڵاته له ئوکڕاین و گورجستان، به ئاشکرا یاسا و رێسا نێوده‌وڵه‌تییه‌کانی پێشێل کردووه".
بیلگیچ، لێدوانه‌که‌ی وه‌زاره‌تی ده‌ره‌وه‌ی مۆسکۆی به شتێکی گاڵته‌جاڕانه ناوبرد و رایگه‌یاند: "رووسیا له رووی سیاسی و سه‌ربازییه‌وه پشتیوانی له رژێمی سوریا ده‌کات و به‌مدواییه‌ش، له کوشتوبڕی سه‌دان هاووڵاتیی سڤیلی ئه‌و وڵاته‌وه گلاوه."
وته‌بێژی وه‌زاره‌تی ده‌ره‌وه‌ی تورکیا، داواشی له رووسیا کرد؛ وانه‌ی مرۆڤایه‌تی به تورکیا نه‌دات.
ئه‌لف. و
پەیوەندی‌دار:
تەگ:
مافی بڵاوکردنەوەی سەرجەم بابەتەکانی ناوەندی نووچە و شرۆڤەی رۆژ پارێزراوە