ناوچەیەکی گرینگی باکووری حەڵەب لە دەست بەرەی نوسڕە ڕزگار کرا

NNSROJ: دوای پێکدادانێکی توندی سەربازی، هێزەکانی سووریای دێموکراتیک توانیویانە ناوچەیەکی باکووری حەڵەب لە دەست چەکدارانی بەرەی نوسڕە دەربێنن کە وەک خاڵی هێرشکردنە سەر هەرێمەکانی عەفرین و دەوروبەری کەڵکی لێ وەردەگیرا.

سەرچاوە سەربازییەکانی "هەسەدە" ڕایانگەیاندووە کە هێزەکانیان، لە دوو ڕۆژی ڕابردوودا توانیویانە گوندی "کەشتەعار"ی سەر بە شارۆچکەی "تل ڕەفعەت" و ناوچەکانی گرێدراو بەو شوێنە، لە باکووری شاری حەڵەب ڕزگار بکەن.

سەرچاوەکە ئەو ناوچەیەی بە "ستراتیژیک" بەناو کردووە، ئەمەش بەو هۆیەوە کە خاڵی هێرشکردنی چەکدارانی بەرەی نوسڕە و هاوپەیمانە ئیسلامیستەکانیان بووە بۆسەر شاری عەفرین و دەوروبەری.

ـ تیرۆریستانی نوسڕە، لەژێر گوللەبارانی هێزەکانماندا لەناوچەکە ڕایان کرد و کۆمەڵێکی زۆر چەک و جبەخانەی شەڕیان لەدوای خۆیان بەجێ هێشتووە کە لەلایەن هێزەکانمانەوە دەستیان بەسەردا گیراوە؛ لێدوانەکەی هەسەدە وای نووسیووە.

بەرەی نوسڕە، کە بە باڵی ئەلقاعیدەی سووریا دەزانرێ، لەگەڵ ژمارەیەک گرووپ و تاقمی جیهادی لە هاوپەیمانەتی دایە کە دەگوترێ تورکیا پشتیوانییان لێدەکات.

ک. م