لە ئەستەنبوڵ تەقینەوە روویدا
Saturday, March 19, 2016
NNSROJ- تەقینەوەی بۆمبێک لە بەردەم قایمقامییەتی گەڕەکی بەیئۆغڵوی ئەستەنبوڵ، کوژران و برینداربوونی پتر لە ٢٥ کەسی لێکەوتەوە.
سەرچاوەکانی هەواڵی تورکیا بڵاویان کردەوە، ئەمڕۆ شەمە ١٩ی مارس لە بەردەم باڵەخانەی قایمقامییەتی گەڕەکی بەیئۆغڵو و لە شەقامی ئیستقلالی نزیک مەیدانی تەقسیمی شاری ئەستەنبوڵ، تەقینەوەیەک روویداوە و بە گوێرەی زانیارییە بەراییەکانیش؛ تا ئێستا ٥ کەس کوژراون و لانیکەم ٢٠ کەسی تریش برینداربوون.
گومان دەکرێت ئەو تەقینەوەیە، لە رێی کەسێکی خۆکوژەوە ئەنجام درابێت و تەرمی یەکێک لە کوژراوەکانیش هی خۆکوژەکە بێت.
هێزەکانی پۆلیسی تورکیا لە دەوروبەری مەیدانی تەقسیم رێوشوێنی ئاسایشیی توندیان گرتوەتەبەر و هاتوچۆی ئۆتۆمبێل بۆ شەقامەکانی دەوروبەری مەیدانەکە قەدەغە کراوە.
رۆژی ١٣ی مارسیش بۆ جاری سێیەم لە شاری ئەنقەرەی پایتەختی تورکیا تەقینەوەیەکی خۆکوژی روویدابوو و بە هۆیەوە ٣٧ کەس کوژرابوون و پتر لە ١٢٠ کەسی تریش بریندار ببوون.
رێکخراوەی "تاک" کە گرووپێکی رادیکاڵی کوردییە، بەرپرسیاریی هەر دوو تەقینەوەکەی ١٧ی شوبات و ١٣ی مارسی ئەنقەرەی لە ئەستۆ گرتبوو.
پەیوەندی‌دار:
تەگ:
مافی بڵاوکردنەوەی سەرجەم بابەتەکانی ناوەندی نووچە و شرۆڤەی رۆژ پارێزراوە