سەرۆکایەتیی هەرێم: تەقینەوەکەی ئەنقەرە بە توندی ئیدانە دەکەین
Monday, March 14, 2016
NNSROJ- سەرۆکایەتیی هەرێمی کوردستان تەقینەوەکەی شاری ئەنقەرەی پایتەختی تورکیای بە کردەوەیەکی نامرۆڤانە لەقەڵەمدا و ئیدانەی کرد.
سەرۆکایەتیی هەرێمی کوردستان لە راگەیەنراوێکدا کە لە سەر ماڵپەڕی رەسمیی خۆی بڵاوی کردوەتەوە، بە ئاماژە بۆ تەقینەوەکەی رۆژی یەکشەممە ١٣ی مارسی شاری ئەنقەرە پایتەختی تورکیا، دەڵێت: "وێڕای ئەوەی زۆر بە توندی ئیدانەی ئەو كردەوە نامرۆڤانەیە دەكەین، سەرەخۆشی لە كەسوكاری قوربانیانی ئەو ڕووداوە دڵتەزێنە دەكەین و هیوای چاكبوونەوەیش بۆ برینداران دەخوازین".
لە درێژەی راگەیەنراوەکەی سەرۆکایەتیی هەرێمی کوردستاندا هاتووە: "تیرۆر و تۆقاندنی هاووڵاتیان و تێكدانی ئاسایش و ئۆقرەیی خەڵك لە ژێر هەر پاساو و ناوێكدا بێت، كردەیەكی ترسنۆكانە و نامرۆڤانەیە و هەڕەشەیە بۆ سەر ئاسایشی كۆمەڵایەتی و پێكەوەژیان و گرفتەكان قووڵتر دەكاتەوە. ئومێدی ئەوە دەخوازین هەرچی زووترە كۆتایی بە تیرۆر و شەڕانگێزی بێت و ئاشتی و پێكەوەژیان باڵ بەسەر ناوچەكەماندا بكێشێت."
رۆژی رابردووش پارتی دیموکراتیکی گەلان(HDP) بە زمانێکی توند، تەقینەوەکەی گەڕەکی قزڵای شاری ئەنقەرەی ئیدانە کردبوو.
تا ئێستا هیچ لایەنێک بەرپرسیارێتیی ئەو تەقینەوەیەی لە ئەستۆ نەگرتووە و سەرچاوەکانی هەواڵی تورکیاش دەڵێن؛ ژمارەی قوربانییانی تەقینەوەکە بۆ ٣٧ کەس بەرز بوەتەوە و زیاتر لە ١٢٠ کەسیش بریندارن.
پەیوەندی‌دار:
تەگ:
مافی بڵاوکردنەوەی سەرجەم بابەتەکانی ناوەندی نووچە و شرۆڤەی رۆژ پارێزراوە